|
1986-1990
Vorið 1986 var
haldið austur á sameiginlega tónleika með
Samkór Selfoss og Árneskórnum. Sungið
var í Selfosskirkju og í Árnesi. Eftir tónleikana
á Selfossi buðu hjónin í Skeiðháholti,
Ólafur og Jóhanna kórnum að koma og dvelja
hjá þeim fram að næstu tónleikum
sem haldnir voru um kvöldið. Voru þetta höfðinglegar
móttökur og ógleymanleg stund.
Árið 1987
varð kórinn tuttugu ára. Ákveðið
var að efna til veglegs afmælishófs af því
tilefni og reyna að ná til sem flestra fyrrverandi
félaga kórsins og stjórnenda hans. Afmælishátíðin
var haldin 27. febrúar 1987 í Domus Medica þar
sem var sungið og dansað fram eftir nóttu.
Þann 21. mars
sama ár var haldið upp á áttræðisafmæli
Sigurðar Ágústssonar og kom kórinn þar
fram ásamt öðrum kórum og sungu þeir
lög eftir afmælisbarnið. Sungið var að
Flúðum og í Selfosskirkju.
Í maí
1987 fór kórinn í söngferð norður
í land. Sungið var á Hvammstanga og í
Miðgarði, þar sem Rökkurkórinn tók
á móti kórnum og söng með honum
fyrir fullu húsi. Á heimleið buðu hjónin
að Ártúnum í Húnavatnssýslu
þau Jón Tryggvason og Sigríður Ólafsdóttir
kórnum til morgunverðar af mikilli gestrisni.
Árið 1988
var skipt um kórbúninga áður en haldið
var til Finnlands og Álandseyja 12. til 22. júní.
Ferðin gekk mjög vel og að henni lokinni hafði
kórinn ferðast til allra Norðurlandanna.
Haustið 1988 var
Sigurður Pétur Bragason ráðinn söngstjóri
kórsins.
Kórinn tók
þátt í 50 ára afmælishátíð
Landssambands blandaðra kóra 5. nóvember 1988
í Laugardalshöllinni. Farið var í vorferðalag
19. maí 1989 og var að þessu sinni farið
til Vestmannaeyja. Ferðaveður var vægast sagt slæmt
og urðu flestir sjóveikir, en þessarar ferðar
er ennþá minnst þegar kórinn þarf
að fara eitthvert sjóleiðis.
Um haustið var
ákveðið að taka upp aðra plötu kórsins.
Um lagavalið orti Sveinn Sæmundsson:
Nú horfa stjörnur
og kvaka lóur
Og koparlokkurnar fara á stjá.
Við brimströnd gjálpandi báran raular
sinn brag um drauminn og æskuþrá.
Ég elska lífið og þrái fegurð
og þetta allt sem um ég syng
en þegar kvöldómar kórsins dvína
við keyrum bílana vítt um kring.
Í september
1990 kom hljómplatan Glerbrot til landsins. Sungið
var á skemmtun hjá Árnesingafélaginu
í Reykjavík 6. október þar sem flutt
voru lög af nýútkominni plötu. Platan
seldist mjög vee og vegna mikillar eftirspurnar þurfti
að gefa út meira magn af hljóðsnældum.
|
