|
1966-1970
Snemma á árinu 1966
var hafist handa við að stofna kór innan Árnesingfélagsins
í Reykjavík. Að vísu var sú hugmynd
ekki ný af nálinni, því hún
var búin að vera á döfinni í mörg
ár og voru á því tímabili búnir
að skjót upp kollinum litlir sönghópar
sem sungu á árshátíð félagsins
eða öðrum skemmtunum en lognuðust síðan
út af.
Í mars 1966 var ráðist
í það að auglýsa eftir söngfólki
með það fyrir augum að stofna blandaðan
kór og Jónas Ingimundarson ráðinn söngstjóri.
Á fyrstu æfingu voru
mættir 6 manns og lofaði það nú ekki
góðu. Á næstu æfingum bættust
fleiri í hópinn og áfram var haldið.
Æft var af kappi fyrir væntanlegt Jónsmessumót
Árnesingafélagsins í Reykjavík sem
halda átti að Borg í Grímsnesi. Söngstjórinn
átti drýgstan þátt í því
að þessi áhugamannakór hélt ótrauður
áfram þrátt fyrir ýmsa byrjunarerfiðleika.
Kórinn fékk inni fyrir
æfingar í Húnvetningaheimilinu í Reykjavík
og var æft einu sinni í viku allt vorið og endað
á því að syngja á fyrrnefndu Jónsmessumóti.
Meðal laga á efnisskránni voru Vísur
gamals Árnesings (Árnesþing) eftir Sigurð
Ágústsson frá Birtingaholti og hefur það
lag fylgt kórnum ætíð síðan.
Að hausti voru æfingar
hafnar á ný og átti kórinn þess
þá ekki kost að fá Jónas Ingimundarson
sem söngstjóra og var Jakob Hallgrímsson ráðinn
í hans stað. Nú bættust fleiri í
hópinn og voru félagar orðnir yfir 20 talsins.
Var þá strax farið að æfa fyrir árshátíð
Árnesingafélagsins í Reykjavík sem
halda átti í febrúar. Æft var einu
sinni í viku fram að jólum en þá
var æfingum fjölgað eftir þörfum.
Sungið var á Hótel
Borg 12. febrúar 1967. Eftir þetta var ákveðið
að stofna kórinn formlega, kjósa stjórn
og starfa áfram sem sjálfstæð deild innan
Árnesingafélagsins í Reykjavík. Árnesingakórinn
í Reykjavík var formlega stofnaður 14. febrúar
1967 og voru stofnfélagar 22. Á stjórnarfundi
21. febrúar sama ár var ákveðið að
kórinn skyldi heita Árnesingakórinn í
Reykjavík. Fljótlega komst á sú hefð
að hafa samstarf við aðra kóra austan fjalls.
Frumraun okkar var 29. apríl 1967 að taka á
móti Söngfélagi Hreppamanna sem hélt
tónleika sína í Gamla bíói.
Tók kórinn á móti þeim með
kaffisamsæti.
Fyrsta starfsári kórsins
lauk 25. júní með söng á Jónsmessumóti
Árnesingafélagsins í Þjórsárveri.
Haustið 1967 tók Þuríður
Pálsdóttir söngkona við stjórn kórsins
og söng hann undir hennar stjórn allt til ársins
1974. Hún tók sér þó hlé
vorið 1972 og Jónína Gísladóttir
undirleikari kórsins leysti hana af. Hlín Torfadóttir
var undirleikari þann tíma.
Fyrstu starfsárin söng
kórinn á mörgum skemmtunum í Reykjavík
og fyrir austan fjall.
Í júní 1969
kom Færeyski Útvarpskórinn til Reykjavíkur.
Árnesingakórinn bauð til kaffisamsætis
og tókst það sérstaklega vel, mikið
sungið og dansaðir færeyskir dansar. Útvarpskórnum
var færð gjöf frá Árnesingakórnum
sem var íslenskt kálfskinn með ljóðinu
"Kveðja" eftir Freystein Gunnarsson og á skinnið
rituðu allir viðstaddir nöfn sín. Útvarpskórinn
bauð Árnesingakórnum til Færeyja og var
stefnt að því að heimsækja þá
sem allra fyrst.
Fyrsta myndatakan var 8. apríl
1970.
Útvarpsupptaka 28. apríl
1970.
Á stjórnarfundi 6.
október var endurvakin sú hugmynd að fara til
Færeyja en engar endanlegar ákvarðanir teknar.
Seinna um veturinn var ferðin ákveðin og hafist
var handa við að safna fyrir henni. Ákveðið
var að hafa happdrætti til fjáröflunar og
voru prentaðir 3.300 miðar sem seldust upp.
Vinningarnir voru:
1. 15 daga ferð til Mallorca
2. Flugfar til Kaupmannahafnar
3. Flugfar til Færeyja
4. Ryksuga
5. Kvenmannsúr
|
